Киевдаги ўзбек дербисида Ғуломжоннинг қўли баланд келди, Маҳмуджон ва Жавраилда бронза + ФОТО

Ўз тарихида 24-маротаба ташкил этилаётган мусобақада дунёнинг йигирмадан зиёд давлати қаторида Ўзбекистон терма жамоаси аъзолари ҳам ҳар уччала йўналишда юртимиз спорт шарафини ҳимоя қилишяпти. Кеча мусобақанинг иккинчи куни уч йўналишда ҳам бир нечтадан вазн тоифасида ғолиб ва совриндорлар аниқланди. 

Хабар берганимиздек, -57 кг вазндаги эркин курашчилар баҳсида икки ҳамюртимиз финалга етиб келганди. Олтин медаль учун кечган беллашувда Ғуломжон Абдуллаев Нодиржон Сафаровга қарши гиламга чиқди ва 7:1 ҳисобида ғалаба қозонди. Ғуломжон олтин, Нодиржон эса кумуш медалга сазовор бўлди. Ушбу вазнда иштирок этган яна бир ҳамюртимиз Маҳмуджон Шавкатов бронза медалини қўлга киритди. У бронза учун кечган драматик баҳсда украиналик Тарас Марковичдан 8:6 ҳисобида устун келди.    

Терма жамоамизга иккинчи бронза медалини -86 кг вазндаги курашчимиз Жавраил Шапиев тақдим этди. У бронза медали учун кечган беллашувда словакиялик Борис Макоевга ҳеч қандай имконият қолдирмади - 7:0. Ҳозирча эркин курашчиларимиз ҳисобида 1 та олтин, 1 та кумуш, 2 та бронза медали бор.