"Классик"ларимиз илк бор умумжамоа ҳисобида биринчи бўлишди + ФОТО

Нуфузли ҳисобланган Poland Open рейтинг турнирида Ўзбекистон терма жамоаси ҳам муваффақиятли иштирок этди. Юнон-рум курашчиларимиздан Ислом Баҳромов (60 кг) ва Жалгасбай Бердимуратов (82 кг) олтин, Мирзобек Раҳматов (72 кг) кумуш, Муҳаммадқодир Юсупов (60 кг), Елмурат Тасмурадов (67 кг), Рустам Ассакалов (87 кг) ва Мўминжон Абдуллаев (130 кг) бронза медалларини қўлга киритишди. 

Шу тариқа, Равшан Рўзиқулов бошчилигидаги Ўзбекистон юнон-рум кураши терма жамоаси Poland Open турнирини 2 та олтин, 1 та кумуш, 4 та бронза медали билан умумжамоа ҳисобида биринчи ўринда якунланди. Юнон-рум курашчиларимиз 130 рейтинг очкоси жамғаришга муваффақ бўлишди. Чемпион 25, кумуш медаль эгаси 20, бронза медаль соҳиблари 15 рейтинг очкосини ўз ҳисобларига қўшиб қўйишди.