Комага тушиб қолган ММА афсонаси, оғир вазнда биринчи UFC чемпиони ўзига келди

Колман ёнғин ўчоғидан ота-онасини олиб чиқишга муваффақ бўлган. Лекин айнан ёнғиндан воқиф қилган итини қутқаришга олов ичига кирган Марк тутундан заҳарланиб, ҳушидан кетади. 

Воқеа жойига етиб келган ўт ўчирувчилар Колманни ҳушсиз ҳолатда шифохонага етказишади. Икки кун жонлантириш бўлимида ётган Марк кеча кечқурун ниҳоят ўзига келди ва кўзини очди. Суратда афсонанинг ўз қизлари Морган ва Кензини бағрига босиб йиғлаётганини кўриш мумкин. 

"Мен дунёдаги энг бахтли инсонман. Эй Худойим, менга омад кулиб боқди. Ота-онам тирик қолишганига ишона олмаяпман. Чунки хонамдан чиққан онимдаёқ нафас етишмаётганди. Афсус, вафодор итим Хаммерни қутқариб қололмадим", - дея кўз ёшларини тия олмади Колман. 

Маълумот учун, 59 ёшли Марк Колман оғир вазнда биринчи UFC чемпиони ҳисобланади. Шунингдек, у PRIDE Гран-присида ҳам чемпион бўлган. У UFC Шон-шуҳрат Залига ҳам қабул қилинган. Марк Колман ММАдаги сўнгги жангини 2010 йилнинг февраль ойида Лас-Вегасдаги UFC 109 турнирида яна бир афсона Рэнди Кутюрга қарши ўтказиб, мағлубиятга учраган эди.