Конья-2021. Бекзод Абдураҳмоновни "сўйишди". Икки курашчимиз олтин, қолганлар бронза учун курашади

Токио Олимпиадаси совриндори Бекзод Абдураҳмонов туркиялик рақибига қарши кечган ярим финал беллашуви якунланишига 30 сония қолганида 6-2 ҳисобида ғалаба қозонаётган эди. Мезбон курашчи мураббийларилари ўша лаҳзада бажарилган усулга балл бериш талаб қилиб, "челленж" сўрашди. Вазият деярли 15 дақиқа кўриб чиқилганидан сўнг туркияликка 4 балл тақдим этишди. Қолган 30 сония вақт Бекзодга вазиятни ўзгартириш учун камлик қилди. Ассоциация раҳбарлари ва мураббийлар қанчалик эътироз билдиришмасин, ҳакамлар қарорини ўзгартирмади. 

Шу тариқа, Бекзод Аьдураҳмонов кечки дастурда бронза медали учун курашадиган бўлди. Эркин курашчиларимиздан Зафарбек Отахонов (-70 кг), Бобур Исломов (-92 кг) ва Ҳасанбой Раҳимов (-125 кг) ҳам Ислом бирдамлиги ўйинларининг бронза медали учун гиламга чиқади. 

Жаҳонгирмирза Туропов (-61 кг) эса ҳал қилувчи финал учрашувида олтин медаль учун курашади. Аёллар ўртасидаги беллашувларда уч нафар курашчи-қизимиз иштирок этган бўлса, улардан биргина Актенге Кеунимжаева (-53 кг) финалга етиб келди. Бироздан сўнг у озарбайжонлик рақибаси билан олтин медаль тақдирини ҳал қилади. Набира Эсенбаева (-62 кг) ва Светлана Оқназарова (-72 кг) эса Ўзбекистонга медалсиз қайтадиган бўлишди.