Кўплаб рекордлар соҳиби Эркин Каримов 80 ёшда + ФОТОРЕПОРТАЖ

Ўзбекистон оғир атлетика федерацияси ташаббуси билан оғир атлетика бўйича ўз вақтида бир қатор рекордлар ўрнатиб, жаҳон спорт майдонларида барчани лол қолдирган, юзлаб шогирдларни тарбиялаб камолга етказган Ўзбек оғир атлетикасининг асосчиларидан, таъбир жоиз бўлса “отаси” дея эътироф этиладиган Эркин Шамсиевич Каримовнинг қутлуғ 80 ёшни қарши олиши муносабати билан тадбир ташкил этилди.

Эркин Каримовнинг 80 йиллигига бағишланган мазкур тадбирда Ўзбекистон Республикаси Туризм ва спорт вазирлиги, Миллий Олимпия қўмитаси, Ўзбекистон оғир атлетика федерацияси, Ўзбекистон Республикаси Қурилиш вазирлиги, Ўзбекистон давлат жисмоний тарбия ва спорт университети, Касаба уюшмалари федерацияси мутасаддилари, мамлакатимиз спортига ҳисса қўшган фахрий устозлар, спортчилар, Эркин Каримовнинг оила аъзолари ва яқинлари ҳамда оммавий ахборот воситалари ходимлари иштирок этишди.

Тадбирда сўз олганлар Эркин Каримовнинг 80 йиллиги билан қутлаб, спортда, хусусан оғир атлетикада эришган ютуқлари ва мамлакатимизда оғир атлетика спорт турини кенг оммалашишида қўшиб келаётган самарали меҳнатларини таъкидлаб, ўзларининг эсдалик совғаларини топширишди.

Таъкидлаш жоиз, айни пайтда Ўзбекистон оғир атлетика федерациясида маслаҳатчи-мураббий сифатида фаолият олиб бораётган Эркин Каримов ўзбек спортчилари орасида биринчилардан бўлиб собиқ иттифоқ халқлари 4-Cпартакиадаси чемпиони, 1967-1972 йилларда ўтказилган собиқ СССР кубоги ва чемпионати ғолиби ва кўп карра мамлакат рекордини ўрнатган, узоқ йиллар ёшларга оғир атлетика сирларини ўргатиб, мураббийлик қилган Эркин Шамсиевич Каримов Ўзбекистон республикасида хизмат кўрсатган спорт устози ва I даражали “Соғлом авлод учун”   ордени билан мукофотланган.  

Тадбир давомида Ўзбекистон оғир атлетика федерацияси томонидан 2021 йил якунлари бўйича йил сарҳисоби ҳам ўтказилди. Ортда қолган 2021 йил давомида оғир атлетика федерацияси билан яқиндан ҳамкорлик қилган ташкилотлар вакиллари, ОАВ ходимлари федерациянинг ташаккурнома ва совғалари билан тақдирланишди.

Тадбир якунида Ўзбекистон Республикаси Бош вазирининг ўринбосари, Туризм ва спорт вазири Азиз Абдуҳакимовнинг Эркин Каримовнинг 80 ёши муносабати билан йўллаган байрам табриги ўқиб эшиттирилди.

Илҳом РАҲМОНОВ тайёрлади, ўз мухбиримиз