“Кремль Кубоги” Швейцарияга йўл оладиган бўлди

Ҳал қилувчи финал учрашувида швейцариялик Белинда Бенчич мезбонлар вакиласи Анастасия Павлюченковага қарши кортга чиқди. Бенчич WTA рейтингида 10, Павлюченкова эса 40-ўринни эгаллаб турибди. 

Белинда 1 соату 45 дақиқа давом этган учрашувда мухлислар олқиши остида ҳаракат қилган рақибасини мағлуб этишнинг уддасидан чиқди - 3/6, 6/1, 6/1. 22 ёшли Бенчич 8, 28 яшар Павлюченкова эса 5 та эйс зарбани амалга оширди. 

Ўзаро ўтказилган учрашувларда Белинда Бенчич энди 4:1 ҳисобида зафар қучмоқда. “ВТБ Кремль Кубоги”даги муваффақиятли иштирок швейцариялик теннис маликасига 180 520 доллар мукофот пули ҳамда 470 рейтинг очкосини тақдим этди. Бу Белинданинг мавсумдаги иккинчи, фаолиятидаги тўртинчи совринга айланди.