Крикет тренерларини тайёрлаш бўйича амалий ҳаракат бошланди

Хусусан, Ўзбекистон Крикет федерацияси крикет бўйича икки босқичли   мураббийларни (Level-1 Criket Coaching ) тайёрлаш мақсадида Ўзбекистон Республикаси Спортни ривожлантириш вазирлиги билан ҳамкорликда вилоятларда жисмоний тарбия ўқитувчилари, спорт мактаблари мураббийларини жалб қилган ҳолда ўқув-йиғин машғулотларини бошлади. 

Ушбу икки босқичли ўқув-семинарга Покистон Ислом Республикасидан таклиф этилган крикет бўйича олий тоифали тренер Тоҳир Муҳаммад ҳамда ЎКФ раиси Азиз Михлиевлар олиб боришмоқда. Айни пайтда мутахассислар томонидан Бухоро вилоятида 18 нафар жисмоний тарбия ва спорт мутахассислари иштирокида биринчи боқич мураббийлик курси ўтказилди ва якунда иштирокчиларга махсус сертификатлар топширилди. 

Бу тартибдаги ўқув-семинарлари Ўзбекистон Республикаси спортни ривожлантириш вазирлиги ҳамда Ўзбекистон Крикет федерациясининг тақвим-режасига кўра, ноябрь ойида Сурхондарё, Қашқадарё, Самарқанд, Фарғона, Андижон ва Тошкент вилоятида бўлиб ўтади. 

Шунингдек, жорий йил декабрь ойида Ўзбекистон Крикет федерацияси Халқаро Крикет Кенгашининг (ICC) мутахассисларини жалб қилган ҳолда иккинчи босқич ўқув-семинарларини ўтказади. Бунда семинар иштирочилари ўқув-машғулотларни якунлагач, имтиҳон топширишади ва имтиҳонлардан муваффақиятли ўтган тингловчилар Халқаро Крикет Кенгашининг биринчи босқичли халқаро  крикет мурраббийси гувоҳномасига эга бўлишади. 

Муҳим жиҳати, биринчи босқич халқаро крикет мураббийлик гувоҳномасини қўлга киритган тренлар нафақат мамлакатимизда балки хорижий давлатларда ҳам крикет бўйича тренерлик қилиш имкониятига эга бўлишади. 

Илҳом РАҲМОНОВ тайёрлади