Кудерметова икки ғалаба эвазига The HSBC Championships асосий тўрига йўл олди, Раҳимова эса...

Кеча мусобақанинг саралаш баҳслари ўтказилди. Унда мамлакатимизнинг биринчи ва учинчи рақамли теннис маликалари Камилла Раҳимова ҳамда Полина Кудерметова ҳам ўз омадини синаб кўрди. Кудерметова саралашнинг 2 соату 5 дақиқа давом этган 1/2 финал учрашувида австралиялик Прицилла Хонни 4/6, 6/4, 6/3 ҳисобида мағлубиятга учратди. Асосий тўрга йўлланма тақдим этган ва 2 соату 1 дақиқа давомийликка эга финал баҳсида эса россиялик Алина Чараевадан уч сет натижасига кўра устун келди - 6/3, 4/6, 6/4.   

Таққослаш учун, Полина Кудерметова WTA рейтингида 123, Прицилла Хон 143, Алина Чараева 130-ўринни эгаллаб турибди. Бир куннинг ўзида икки ғалабага эришган Кудерметова нуфузли мусобақанинг асосий тўрига йўлланмани қўлга киритди. Энди у эртага, 9 июнь куни дунёнинг 28-ракеткаси, чехиялик Мари Бузковага қарши кортга чиқади. 

Афсуски, мамлакатизнинг биринчи ракеткаси Камилла Раҳимова саралашнинг финал учрашувида мағлубиятга учраб, мусобақадаги иштирокини якунлади. Дунёнинг 89-ракеткаси бўлиб турган Камилла роппа-роса 70 дақиқа давом этган 1/2 финалда WTA рейтингида 214-поғонадан жой олган грузиялик Екатерина Горгодзени 6/2, 6/3 ҳисобида доғда қолдирди. Аммо саралашнинг финал баҳсида дунёнинг 54-ракеткаси, саралаш турнирида биринчи рақам остида таснифланган германиялик Татьяна Марияга 4/6, 3/6 ҳисобида ютқазиб қўйди.