Кураш бўйича Осиё чемпионатида қочоқлар жамоаси ҳам иштирок этади

Ушбу қитъа чемпионатида 20 та давлатдан 250 нафарга яқин энг сара полвонлар иштирок этиши  кутилмоқда. Аҳамиятли жиҳати, ўн учинчи бор ўтказилаётган катталар ўртасидаги Осиё чемпионатида илк бор қочоқлар жамоаси ҳам иштирок этади. 

Шу ўринда таъкидлаш жоиз, қочоқлар бу - ижтимоий, сиёсий ёки бошқа жиддий сабабларга кўра, ўз ватанидан чиқиб кетган инсонлар сифатида тушунилади. Уларда асосий ватанлари номидан халқаро спорт мусобақаларида иштирок этиш имконияти мавжуд эмаслиги сабабли, Халқаро Олимпия қўмитаси томонидан қочоқлар жамоаси сифатида иштирок этиши таъминлаб келинмоқда.

Кураш бўйича халқаро мусобақалар тарихида ҳам бу илк бор юз бермоқда. Қочоқлар жамоалари тўғрисидаги қарор 2023 йил Ашхабодда бўлиб ўтган IKA Конгресси ва 2024 йил Дубай шаҳрида ўтказилган IKA Бошқарув қўмитаси йиғилишларида муҳокама қилинган ва тегишли нормативлар қабул қилинган.

Эндиликда қочоқлар жамоаси Халқаро Кураш ассоциацияси тақвимидаги барча мусобақаларда иштирок этиши мумкин. Бунда жинс тоифасидан ташқари ирқи, миллати ва ижтимоий келиб чиқишлари ҳисобга олинмайди. Жамоа Халқаро Кураш ассоциацияси томонидан координация қилинади.

Халқаро Олимпия қўмитаси стандартлари асосида жамоанинг байроғи ва мадҳияси сифатида Халқаро Кураш ассоциациясининг байроқ ва мадҳиясидан фойдаланилади. Теҳрон гиламларида қочоқлар жамоаси сафида 5 нафар аёл курашчи медаллар учун баҳсларга киришади.