Курашчи-қизларимиз Осиё чемпионатини 5 та медаль билан кучли бешликда якунлашди

Бугун қизларимиз (U 17) қитъа чемпионати медаллари учун рақибаларига қарши баҳс олиб боришди. 43 кг вазндаги курашчи-қизимиз Гулнура Русланова айлана тизимда ўтган беллашувлар якунида кумуш медаль соҳибига айланди. Гулнура Жазира Налибаевани (Қозоғистон) 10-0, Мунгунсолонго Балсанни (Мўғулистон) 11-0, Диана Амантуровани (Қирғизистон) 6-1 ҳисобида енгиб, бўлажак чемпион, ҳиндистонлик Ритика Ритикага имкониятни бой бериб қўйди.      

49 кг вазн тоифасида юртимиз шарафини ҳимоя қилган Сандугаш Женбаева Осиё чемпионатининг бронза медалига сазовор бўлди. У учинчи ўрин соҳибини аниқлаб берган учрашувда қозоғистонлик Айимгул Абиловадан 6-2 ҳисобида устун келди. 

Бугунги кун баҳсларида терма жамоамизга яна бир медални Севинч Султонова тақдим этди. 65 кг вазнда курашган Тўймурод Адизов шогирди учинчи ўрин учун кечган муросасиз беллашувда япониялик Сава Хигашини 8-7 ҳисобида енгди.

Шу тариқа, курашчи-қизларимиз (U 17) Осиё чемпионатини 2 та кумуш, 3 та бронза медали билан умумжамоа ҳисобида кучли бешликда якунлашди.

Кумуш медаль

43 кг: Гулнура Русланова 

61 кг: Улмекен Есенбаева  

Бронза медаль

40 кг: Гуласал Абдуназарова 

49 кг: Сандугаш Женбаева 

65 кг: Севинч Султонова