Курашчилар “Прокурор кубоги”да беллашишди

Жумладан, 2018 йил Индонезияда бўлиб ўтган XVIII ёзги Осиё ўйинлари дастуридан жой олгани унинг бугунги кундаги нуфузидан далолат бермоқда. Тарихи минг йилларга бориб тақаладиган курашимизни юртимизда янада оммалаштириш бўйича бир қатор мусобақалар ташкил қилинмоқда. 

Пойтахтимиздаги “Универсал” спорт мажмуасида бўлиб ўтган “Прокурор кубоги” мусобақаси ҳам ана шу турнирлардан биридир. Мусобақанинг тантанали очилиш маросимида Ўзбекистон Республикаси Президенти маслаҳатчиси Абдужаббор Абдувоҳидов, Ўзбекистон Республикаси Бош прокурори Ниғматилла Йўлдошев, Жисмоний тарбия ва спорт вазири Дилмурод Набиев, МОҚ раиси Рустам Шоабдураҳмонов ва бошқа мартабали меҳмонлар иштирок этишди. 

Мусобақанинг тантанали очилиш маросимида сўзга чиққан расмийлар юртбошимиз томонидан спортни, шу жумладан, миллий курашимизни ривожлантиришга қаратилаётган эътибор хусусида алоҳида тўхталиб ўтишди. 

Шубҳасиз, барчамиз курашимизнинг довруғи янада ошиши ва унинг Олимпия ўйинлари оиласидан жой олишини истаймиз. Маросимда расмийлар бу каби истиқболли режалар бўйича қатор дастурлар ишлаб чиқилаётган ҳақида алоҳида тўхталиб ўтишди. Тадбир давомида 2020 йил лауреатлари тақдирланди. Унга кўра, ўтган йилнинг энг яхши курашчиси номига Муҳсин Ҳисомиддинов сазовор бўлди.

Тантанали очилиш маросимдан сўнг беллашувларга старт берилди. Мусобақада юртимизнинг турли чеккаларидан келган иқтидорли полвонлар ўз маҳоратларини намойиш қилишди. Мусобақа якунида ғолиб ва совриндорлар ташкилотчиларнинг қимматбаҳо эсдалик совғалари ва медалларини қабул қилиб олдилар. 

Тақдирлаш маросими якунида МОҚ раиси Ўзбекистон кураш федерациясига Қўмитанинг эсдалик совғасини тақдим қилди. Шунингдек, маросимда МОҚ Бош котиби Ойбек Касимов ва МОҚ раиси ўринбосари Шерзод Ташматов ҳам спортчиларни тақдирлашди.