Кутганмидингиз? Тошкент яна бир нуфузли катта теннис мусобақасига мезбонлик қилади!

Ҳа, кўпчилик теннис иҳлосмандлари "Дэвис Кубоги"да АҚШга қарши ўтказилган ўйинлардан сўнг камида бир ёки икки йилга катта теннис ўйинларидан (мезбонликдаги) мосуво бўлдик, деб ўйлагани аниқ.

Аммо, ундай эмас. Тошкент яна бир нуфузли мусобақага мезбонлик қилади. 11-15 апрель кунлари пойтахтимизда жойлашган Теннисга ихтисослашган Олимпия мактаби хард кортларида Billie Jean King кубогининг Осиё ва Океания биринчи гуруҳидан ўрин олган ўйинлар ўтказилади.

Аёллар ўртасида ўтадиган ушбу мусобақанинг Ўзбекистон терма жамоаси ўрин олган — Осиё ва Океания биринчи гуруҳида бизга Хитой, Ҳиндистон, Япония, Жанубий Корея ва Таиланд рақиблик қилади. Ушбу олтилалик гуруҳда биринчи ва иккинчи ўринни қўлга киритган жамолар плей-оффга, сўнгги иккита ўриндаги жамоалар эса иккинчи гуруҳга тушади.

Тошкентга келувчи терма жамоаларнинг таркиблари ҳам маълум бўлиб улгурган, аммо негадир ушбу мусобақанинг ҳатто ўтказилиши ҳақида Ўзбекистон теннис федерацияси ҳалигача оғиз очгани йўқ. Ваҳоланки, мусобақа стартига бир ойдан кам вақт қолди.


Ўзбекистон аёллар термаси мазкур мусобақада қуйидаги таркибда иштирок этиши айтилган:

Нигина Абдураимова (1994, WTA-175)
Оқгул Омонмуродова (1984)
Севиль Юлдашева (2002, WTA-992)
Мафтунабону Қаҳрамонова (2005).

Жамоа сардори — Оқгул Оманмуродова.


Ўзбекистон аёллар терма жамоаси ўтган йили мазкур мусобақанинг Осиё ва Океания иккинчи гуруҳида иштирок этиб, биринчи ўринни қўлга киритган эди. Плей-оффда Мўғулистонни енгган ракеткаларимиз ўшанда биринчи гуруҳ йўлланмасини қўлга киритган эди.

Айни дамда жамоамиз Billie Jean King рейтингида 122 терма орасида 39-ўринни эгаллаб турибди. Ушбу турнир орқали ўз ўрнимизни янада яхшилаб олиш имконияти мавжуд.

Термамиз мазкур мусобақада 15-марта иштирок этмоқда. Ушбу турнирда илк бор 1995 йилда кортга чиққан ҳамюртларимизнинг энг яхши иштироки 2008 йилга тўғри келади. Ўшанда теннисчиларимиз иккинчи жаҳон гуруҳининг плей-офф баҳсларигача етиб боришган эди.

Таркибларни кўриб, очиғи аутсайдерлардан эканимизни пайқаш қийин эмас. Аммо, аёллар ўртасидаги теннисимизда яна бир ёш авлод етишиб чиқаётгани, уларни илк бор катта синов кутаётганини кўриш ҳам қизиқ.

Қисқаси, кетма-кет иккинчи ойда ҳам ўзбекистонлик теннис мухлислари зерикиб қолмасликлари тайин.

Диёр Мавлонов