Леон Эдвардс Колби Ковингтонга қарши жанг қилишдан бош тортди

Жанг якунланганидан сўнг UFC президенти Дана Уайт Леоннинг кейинги рақиби Колби Ковингтон бўлишини маълум қилганди. Дивизион рейтингида иккинчи ўринни эгаллаб турган Колби кечаги чемпионлик жангида захира жангчиси эди. 

"Очиғи, бунда қандай маъно бор, тушунмаяпман. Ковингтон деярли бир ярим йилдан бери жанг ўтказмаяпти. У шунчаки ишсиз ўтирганди. Қандай қилиб чемпионлик жанги учун имкониятга эга бўлди, шунга ақлим етмаяпти. Дивизионда жанг ўтказиб, чемпионлик учун муносиб меҳнат қилган йигитлар етарлича топилади. Энди мен қиролман! Ўйлашимча, кейинги рақибим ким бўлишини ўзим аниқлашим керак ва бунга тўлиқ ҳақлиман", - деди британиялик UFC 286 турниридан кейинги матбуот анжуманида. 

Эдвардснинг сўзларига қараганда, унинг кейинги рақиби Хорхе Масвидал бўлиши лозим. Бунинг учун Хорхе 8 апрель куни Майамида ўтказиладиган UFC 287 турнирида бразилиялик Гилберт Бернсни мағлуб этиши шарт.

"Агар Масвидал Бернсни мағлуб эта олса, у менинг айни пайтдаги энг идеал рақибимга айланарди. Бу жанг пуллик трансляция нуқтаи назаридан ҳам катта даромад келтирарди. Қолаверса, ўртамизда адоват бор. Бу ўзига яраша кичик тарихга ҳам эга. Орани очиқ қилиб, бунга нуқта қўйишимиз керак. 

Яна Колби ҳақида. Мен чемпионлик камари йўлида 12 та жанг ўтказдим. Ковингтон эса жароҳати бўлмаса ҳам, шундай имкониятга яқин келди. Колби ўшанда менга бу ўзим ким деб киноя қилганди", - дея сўзига якун ясади чемпион.