"Li 7 эффекти?". Ўзбекистонлик курашчилар U-23 Жаҳон чемпионатига ўз ҳисобидан боряпти(ми)?

Дунё биринчилигида Ўзбекистон ёшлар терма жамоасининг ҳам иштирок этиши ҳақида ҳозирча ҳеч қандай расмий маълумотлар йўқ. Сабаби, Ўзбекистон спорт курашлари ассосиацияси яқиндагина Иорданиянинг Амман шаҳрида бўлиб ўтган U-20 Жаҳон чемпионатига ҳам бирор бир курашчини юбормаган эди.

UWW.UZB интернет нашрининг хабар беришича, Алишер Ғаниев, Аброр Атабаев, Дониёрхон Накибов каби курашчиларимиз Албаниядаги жаҳон биринчилигига ўз ҳисобидан борадиган бўлишган. Аммо хабар расман тасдиқланмагани айтилади. Сўнгги воқеъликлардан келиб чиқилса, бунга ишонса бўлади.

Терма жамоанинг яна бир аъзоси Абдулло Алиев ҳам жахон чемпионатига борадиган кўринади. У ўзининг инстаграм саҳифасига ушбу расмни жойлаб, Let’s go Albaniya дея изоҳ қолдирди.

Афсуски, ҳолатга тушунтириш бериш учун Спорт курашлари ассоциациясининг матбуот хизмати ҳам фаолият юритмайди. Аввалроқ, айнан Ўзбекистон спорт курашлари ассоциацияси Париж Олимпиадасида делегациямиз ҳисобига олтин медални тақдим этган Разамбек Жамаловнинг икки нафар мураббийига кафолатланган мукофот пулларидан ташқари автомобиллар ҳам совға қилган эди.

Эслатиб ўтамиз, шу қандайдир икки ой ичида курашчиларимиз U-20 жаҳон чемпионатини, тарихда илк бор ЖЧга йўлланма олган волейболчиларимиз эса дунё биринчилигини ўтказиб юборган эди.

Умид қиламизки, ҳали вақт бор ва Ўзбекистон спорт курашлари терма жамоаси Албаниядаги жаҳон чемпионатига (спортчилар ҳисобидан эмас) юборилади.