Литва спорт университети билан ЎзДЖТСУнинг ҳамкорлиги мустаҳкамланмоқда

Онлайн учрашувда Литва спорт университетидан университет ректори профессор Диана Реклаитеине ва университет юристи Саулиус Валасевиcиус иштирок этдилар. Мазкур учрашувда Ўзбекистон давлат жисмоний тарбия ва спорт университети раҳбариятидан университет ректори, профессор Маҳмуджон Болтабаев, илмий ишлар ва инновациялар бўйича проректор Камил Баязитов, Халқаро ҳамкорлик бўлими бошлиғи Шухрат Тоштурдиев ва Ўзбек - Беларусь қўшма жисмоний тарбия, спорт ва туризм факультети декани Гулсара Асатова қатнашди.

Мазкур онлайн учрашувдан кўзланган мақсад икки университет ўртасида умумий ҳамкорликни йўлга қўйиш бўйича шартномалар имзолашдан иборат бўлиб, томонлар турли йўналишлар бўйича ҳамкорлик қилиш борасида музокара олиб бордилар. Булар асосан, университетлар ўртасида талабаларнинг академик алмашинуви жорий этиш, шунингдек профессор-ўқитувчиларнинг малакасини ошириш бўйича бир нечта таклифлар илгари сурилди.

Таъкидлаш жоизки, Диана Реклаитеиненинг эътироф этишича, Литва спорт университет жисмоний тарбия ва спорт соҳасидаги ўқув дастурларини тақдим этадиган мутахассислик олий ўқув юрти ҳисобланади. Бугунги кунда бу ЛСУда маҳаллий ва дунёнинг турли бурчакларидан 1500 дан ортиқ талабалар таҳсил олишади. Университет Литвадаги энг катта жисмоний тарбия ва спорт фанлари маркази бўлиб, мамлакатнинг спорт қадриятлари ва анъаналарини қўллаб-қувватлайди. Университет битирувчилари орасида кўплаб таниқли олимлар, дунёга машҳур мураббийлар, таниқли спортчилар, таниқли жамоат арбоблари бор. Бир қатор битирувчилари Олимпия чемпионлари, жаҳон ва Европа чемпионлари ҳисобланишади.

Онлайн учрашув доирасида университетлар вакиллари ўзларининг бугунги ва келажакдаги режалари, инновацион ғоялар билан ишлаш принтсиплари ва устувор йўналишлари бўйича келишиб олишди.