​"Локомотив" янги йил олдидан яна бир трансферга қўл урди

Бунга қадар жамоа АГМКда тўп тепган легионер Йован Жокич, ўтган мавсумни "Бунёдкор"да ўтказган сербиялик хужумчи Филип Раевац ҳамда жамоанинг собиқ футболчиси Азизбек Хайдаровни ўз таркибига қўшиб олганди.

"Локомотив"нинг янги мавсум ҳисобидан тўртинчи трансфери элитани тарк этган "Нефтчи" ҳимоячиси Авазбек Ўлмасалиев бўлди. Бу хақда сайтимиз ходими Шаҳбоз Беғамов маълум қилди. Мазкур иқтидорли ҳимоячи ўтган мавсумда Суперлигада ёрқин уйинлари билан барчада илиқ таассурот қолдирганди. Бизга маълум бўлишича, Ўлмасалиев ва "Локомотив" келишувга эришган.

Кеча "Локомотив" жамоасининг чемпионлик муносабати ва янги йилга аталган байрам базми бўлиб ўтди. Унда футболчиларга олтин медаллар топширилди. Шунингдек, клуб раҳбарияти бугун, яъни 31 декабрь куни жамоанинг асосий таркиб футболчиларига чемпионлик учун "Жентра" автомобилларини топшириши кутилмокда.

Айни пайтда "Локомотив" жамоасининг бир қатор футболчилари билан шартнома муддати тугаган. Ҳозирча жамоа Игнатий Нестеров, Маъмур Икромов, Садриддин Абдуллаев каби футболчилари билан янги битимга имзо чеккан. Колган етакчиларга янги шартномалар таклиф этилган. Бироқ улар билан янги келишув ҳали расмийлаштирилмаган. Қайд этиш керакки, жамоанинг қатор футболчиларига АГМК, "Навбахор" ҳамда "Пахтакор" жамоаларидан қизиқиш ва таклифлар мавжуд.