London Chess Classic 2025. Нодирбек Абдусатторов муддатидан олдин чемпион!

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам муваффақиятли одимламоқда. Биринчи турда британиялик гроссмейстер Гавайин Жонс билан дуранг ўйнаган ҳамюртимиз кетма-кет олтита учрашувда ғалабага эришганди. 

Кеча тунда ўтказилган 8-тур баҳсида Абдусатторов энг яқин таъқибчиси, турнирда биринчи рақам остида таснифланган франциялик Алиреза Фирузджага қарши баҳс олиб борди. Қора доналарда ўйнаганига қарамай, ҳамюртимиз ушбу партияда ўзига керакли дуранг натижани қайд эта олди. Бу билан Нодирбек Алиреза билан ўртадаги 2 очколик фарқни сақлаб қолди ва муддатидан аввал London Chess Classic 2025 чемпионига айланди. 

Гроссмейстеримиз бугун ўтказиладиган сўнгги 9-тур учрашувида украиналик Павел Эльяновга қарши оқ доналарда ўйнайди. Эльянов 3,5 очко билан 6-ўринни эгаллаб турибди. Нодирбек 8 имкониятдан 7 очко жамғариб, 1-ўринни нақд қилиб улгурди. Фирузджа 5 очко билан 2-ўриндан жой олган бўлса, кучли учликка 4,5 очкога эга англиялик Никита Витюгов якун ясаган.