London Chess Classic 2025. Нодирбек Абдусатторовда чиройли ғалаба ва у энди якка пешқадам!

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам иштирок этяпти. Биринчи даврада британиялик гроссмейстер Гаваин Жонс билан дуранг ўйнаган ҳамюртимиз кетма-кет икки ғалабага эришди. Иккинчи турда Абдусатторов оқ доналарда ҳиндистонлик Мишра Абҳиманюни мағлубиятга учратганди. 

Кеча тунда ўтказилган учинчи турда Нодирбек қора доналарда ўйнаганига қарамай, Англия шарафини ҳимоя қилаётган россиялик гроссмейстер Никита Витюговни чиройли тарзда таслим этди. Витюгов дастлабки икки турда дуранг ўйнаганди. 

Учинчи турда шахматчимизнинг асосий рақиблари очко йўқотишди. Грециялик Николас Теодору Мишра Абҳиманю билан, турнирнинг биринчи рақамли иштирокчиси франциялик Алиреза Фирузджа эса англиялик Майкл Адамс билан дуранг ўйнади. Учинчи турда биргина Абдусатторов ғалабага эришди. Бу эса унинг турнир жадвалида 2,5 очко билан якка пешқадам бўлиб олишини таъминлади. Теодору ва Фирузджа ҳисобида 2 очкодан бор. 

Бугун London Chess Classic 2025 турнирида 4-тур партиялари ўйналади. Нодирбек Абдусатторов қора доналарда англиялик гроссмейстер Майкл Адамсга қарши баҳс олиб боради. Адамс учта дуранг эвазига 1,5 очко билан турнир жадвалида 4-ўринни банд этган.