London Chess Classic 2025. Нодирбек Абдусатторовда кетма-кет тўртинчи ғалаба!

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам бош соврин учун кураш олиб боряпти. Биринчи турда британиялик гроссмейстер Гаваин Жонс билан дуранг ўйнаган ҳамюртимиз кетма-кет тўртта ғалабага эришди. 

Абдусатторов иккинчи турда оқ доналарда ҳиндистонлик Мишра Абҳиманюни, учинчи турда қора доналарда Англия шарафини ҳимоя қилаётган россиялик гроссмейстер Никита Витюговни, тўртинчи турда 54 ёшли Буюк Британиялик чемпиони Майкл Адамсни мағлубиятга учратганди. 

Кеча London Chess Classic 2025 турнирининг бешинчи турида Нодирбек оқ доналарда ўйнади. Бу сафар у 5-тур олдидан турнир жадвалида 3-ўринда борган грециялик Николас Теодороуга қарши баҳс олиб борди ва рақибини чиройли тарзда таслим этди. Бу турда биргина ҳамюртимиз ғалабага эришди. Қолган тўртта партияда кучлар тенг келди.   

Кетма-кет тўртта ғалабадан кейин Абдусатторов турнир жадвалида 4,5 очко билан якка пешқадамликни мустаҳкамлади. Турнирда биринчи рақам остида таснифланган франциялик Алиреза Фирузджа бу турда англиялик Гавайин Жонс билан дуранг ўйнади. Фирузджа 3,5 очко билан иккинчи ўринни эгаллаб турибди. Никита Витюгов, Люк Макшейн ва Николас Теодороу ҳисобида 2,5 очкодан бор. Бугун Абдусатторов 6-турда америкалик таниқли гроссмейстер Сэм Шенклендга қарши қора доналарда ўйнайди.