London Chess Classic 2025. Қоч, Нодирбек келяпти. Абдусатторовда кетма-кет олтинчи ғалаба!

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам муваффақиятли одимламоқда. Биринчи турда британиялик гроссмейстер Гавайин Жонс билан дуранг ўйнаган ҳамюртимиз кетма-кет олтита ғалабага эришди. 

Абдусатторов иккинчи турда оқ доналарда АҚШ шарафини ҳимоя қилаётган ҳиндистонлик Мишра Абҳиманюни, учинчи турда қора доналарда Англия шарафини ҳимоя қилаётган россиялик гроссмейстер Никита Витюговни, тўртинчи турда 54 ёшли Буюк Британиялик чемпиони Майкл Адамсни, бешинчи турда қора доналарда АҚШ чемпиони Сэм Шенклендни мағлубиятга учратганди. 

Кеча тунда ўтказилган 7-турда Абдусатторов оқ доналарда англиялик гроссмейстер Люк Макшейнни таслим этди. Кетма-кет олтита ғалабадан кейин Нодирбек турнир жадвалида 6,5 очко билан якка пешқадамликни давом эттирмоқда. Еттинчи турда фақат ҳамюртимиз ғалаба қозонди, қолган барча партиялар дуранг натижа билан якунланди. 

Абдусатторов энг яқин таъқибчиси турнирда биринчи рақам остида таснифланган франциялик Алиреза Фирузджани энди 2 очкога ортда қолдирмоқда ва қизиғи, эртага 8-турда улар ўзаро тўқнаш келишади. Камида дуранг натижа Нодирбек Абдусатторовни муддатидан аввал London Chess Classic 2025 чемпионига айлантиради. 

Бугун London Chess Classic 2025 турнирида дам олиш куни сифатида эълон қилинган.