Мадина ва Ҳожиакбарнинг чиқишидан ФОТОРЕПОРТАЖ

Осиё чемпионатининг кечаги куни ҳамюртимиз Мадина Файзуллаева учун ҳам муваффақиятли ўтди. 2005 йилда туғилган қизимиз ҳам ўсмирлар, ҳам ёшлар тоифасида иштирок этиб, жами 5 та медални қўлга киритди. 

-76 кг вазн тоифасида қатнашган Файзуллаева даст кўтаришда 82 кг., силтаб кўтаришда 106 кг., икки кураш бўйича эса 188 кг. натижа кўрсатди. Бу оғирликлар унга ўсмирлар тоифасида ҳар уч йўналишда олтин, ёшлар категориясида эса даст кўтариш ва умумий ҳисобда бронза медалларини келтирди.

Навбатдаги -89 кг. вазн тоифасида бўлиб ўтган беллашувларда ёш оғир атлетикачимиз Ҳожиакбар Олимов ҳам маҳорат кўрсатди. У даст кўтариш машқида 145 кг., силтаб кўтариш машқида эса 192 кг. лик маррани забт этди. Бу уринишлари унга кумуш ва олтин медалларни ҳадя этди. 

Ҳожиакбар икки кураш ҳисобида 337 кг. ни забт этиб, шоҳсупанинг иккинчи поғонасидан ўрин эгаллади. Осиё чемпионати баҳслари давом этмоқда.

Алимурод МАМАДАМИНОВ, ўз мухбиримиз