Магдалена Френх фаолиятидаги илк совринни қўлга киритди

Мусобақа бош соврини польшалик Магдалена Френхга насиб этди. Дунёнинг 43-ракеткаси бўлиб келган Френх 2 дақиқаси кам 2 соат давом этган финал учрашувида WTA рейтингида 152-поғонадан жой олган австралиялик Оливия Гадекини мағлубиятга учратди - 7/6(5), 6/4. 

Бу теннисчиларнинг ўзаро ўтказган илк учрашуви эди. Френх 4, Гадеки 2 та эйс зарбасини амалга оширган. Брейклар бўйича устунлик ҳам Магдалена томонида бўлди - 3 га 2. Польшалик теннис маликаси фаолиятидаги илк WTA совринини қўлга киритди. 

У 500 рейтинг очкоси ва 142,000 АҚШ долларига эга бўлди. Френх бугун эълон қилинган янги рейтингда 32-ўринга кўтарилиб олди. Гадеки эса бир ҳафталик меҳнатидан 325 очко ва $87,655 ишлаб олди. Австралиялик бугун Топ-100`да дебют қилди.