Магнус Карлсен блиц йўналишида жаҳон чемпиони! Бизникилар нечанчи бўлишди?

Умумий мукофот жамғармаси 1 150 000 АҚШ долларини ташкил қилувчи жаҳон чемпионатининг блиц йўналишида амалдаги жаҳон чемпиони Магнус Карлсен кучли эканлигини яна бир бор исботлади. 

Норвегиялик шахмат юлдузи 21 имкониятдан 17 очко жамғариб, жаҳон чемпионига айланди. Иккинчи ўринни 16,5 очко билан польшалик Ян-Кшиштоф Дуда эгаллади. Америкалик Хикару Накамура 14,5 очко билан кучли учликка якун ясади. 

Жаҳон чемпионатида иштирок этган ёш шахматчиларимиздан Шамсиддин Воҳидов ва Нодирбек Абдусатторов 11 очко жамғарди. Қўшимча кўрсаткичларга кўра Шамсиддин 77, Нодирбек эса 81-ўринни эгаллади. Нодирбек Ёкуббоев эса 9 очко билан энг сўнгги 150-ўринни банд этди.  

Эслатиб ўтамиз, Шамсиддин Воҳидов рапид, яъни тезкор шахматда қора доналарда ўйнашига қарамай, жаҳон чемпиони Магнус Карлсенни мағлубиятга учратиб, яхшигина шов-шувга сабабчи бўлган эди.