Магнус Карлсенни мағлуб этган ўзбеклар сони биттага кўпайди

Кечаги кун доирасида биз учун аҳамиятли партия ўйналди. Тўртинчи турда ҳамюртимиз Жаҳонгир Воҳидов рапид ва блиц йўналишида амалдаги жаҳон чемпиони, рейтинг пешқадами Магнус Карлсенни мағлуб этишни уддалади. Партиядан кўриниб турибдики, Жаҳонгир ҳатто Карлсенга мот қўйишга ҳам муваффақ бўлган.

Дарвоқе, бир муддат аввал яна бир истеъдодли шахматчимиз Муҳиддин Мадаминов ҳам Магнус Карлсенни мағлубиятга учратганди. Ҳар икки шахматчимиз ҳам айни пайтда пойтахтимиз мезбонлигида ўтаётган нуфузли "Uzchess Cup 2024" турнирида иштирок этяпти. 

Маълумот учун, "Titled Tuesday" мусобақаси онлайн турнир бўлиб, ундаги очколар расмий рейтингга киритилмайди. Онлайн рейтингга киритилади, холос. Бу асосан машқ ва дам олиш учун ўйналадиган онлайн турнир ҳисобланади.