Маҳмуд Мурадов Лигасининг илк турнирига бағишланган матбуот анжумани бўлиб ўтди

Ушбу лиганинг илк турнири пойтахтимиздаги «Юнусобод» спорт мажмуасида ташкил этилади. Жанг оқшоми 22 октябрга белгиланган. Миллий Олимпия қўмитасида мазкур оқшом олдидан матбуот анжумани бўлиб ўтди. Тадбирда МОҚ Бош котиби Ойбек Касимов, лига раҳбари Маҳмуд Мурадов, «Мuradov Leon Team» жамоаси мураббийи Жасур Алижонов ҳамда оқшом жангчилари Шоҳасан Мирзаматов, Баҳодир Бакиев, Рамазон Темиров иштирок этди.

Дастлаб матбуот анжуманида модератор вазифасини бажарган таниқли шарҳловчи Даврон Файзиев лига ва UzReport TV ўртасида шартнома имзоланганилиги ҳамда ташкилот томонидан уюштириладиган барча тадбирлар телеканал томонидан жонли тарзда намойиш этилишини мамнуният ила баён қилиб, сўз навбатини Маҳмуд Мурадовга берди.

- Аввало, келганингиз учун барчангизга раҳмат айтмоқчиман. Бу ташкилотимизнинг илк матбуот анжумани. Бизнинг лигамиз ёш спортчиларнинг катта ташкилотларга ўтишида кичик трамполин вазифасини ўтайди. Биз нафақат Тошкент, балки Нукус, Самарқанд, Қўқон, Андижон шаҳарларида, умуман бутун мамлакат бўйлаб жанг оқшомлари ўтказишни режалаштиряпмиз.  

Иштирокчилар анжуманда йиғилган ОАВ ҳамда мухлисларга миннатдорчилик билдириб, оқшом учун режалари билан ўртоқлашдилар.

Шундан сўнг модератор савол-жавоблар қисмини очиб, сўз навбатини журналист ва мухлисларга берди.

- Нурсултон Рўзибоев билан шартнома имзоланиши режалаштирилган эди. Рўзибоев билан келишувга эриша олмадингизми?

- Нурсултон билан муносабатларимиз яхши, афсуски, менимча у Россияда жанг қилади, чунки унинг Москвадаги турнир билан шартномаси бор. Ин Шаа Аллоҳ, уни лигамизнинг кейинги турнирларида кўрсак хурсанд бўламиз.

- Билишимизча, турнирдан олинган молиявий фойда хайрия ишларига сарфланар экан. Бу ғоя кимдан чиқди?

- Бу бизнес режа ҳам, бизнес лойиҳа ҳам эмас. Мен аввалари Чехияда юрган пайтларим ёш болаларга ёрдам беришни орзу қилардим. Биз жамоамиз билан турнирдан тушган фойдани болалар уйларига сарфлашни келишиб олдик (сотилган чипталардан тушган фойда назарда тутилмоқда).

- Кечада фақат маҳаллий ҳакамлар бўладими ёки хорижлик мутахассислар ҳам таклиф этилганми?

- Чет эллик халқаро тоифадаги ҳакамлар ҳам келишади, маҳаллий ҳакамлар эса уларга ёрдам беради.

Саволлар узоқ давом этди. Ўз ўрнида Мурадов лиганинг асосий мақсади, келгусидаги режалари ва албатта ўзининг қачон октагонга қайтиши ҳақида гапириб ўтди.

- Оctagon League турнирларида иштирок этдингиз. Ушбу лига билан жанг учун яна шартномангиз борми?

Шоҳасан Мирзаматов: Айни пайтда фақат Маҳмуд билан шартномам бор, шу шартнома асосида ишлаймиз.

- Рамазон Темиров олдинги жангини нокаут билан якунлаган эди, бу жангда нечанчи раундда рақибини нокаут қилмоқчи?

- Ғалаба ҳам, мағлубият ҳам Аллоҳдан. Вазият бўлдими, рақибингизни хатосини кўрганингизда режангизни амалга оширасиз. Йиқилса бахтингиз (кулади). Бу жангда ҳам нокаут қилишга ҳаракат қиламиз.

Шунингдек, жангчиларнинг оқшом учун спорт кийимлари ҳам намойиш этилди. Кечанинг тўлиқ карди маълум. 21 октябрь куни вазн ўлчаш маросими бўлиб ўтади.