Маҳмуд Мурадовнинг навбатдаги рақиби ҳақида нималар биламиз?

Ҳамюртимизнинг навбатдаги рақиби - польшалик Криштоф Жотко бўлади. 

31 ёшли Жотко ўз вақтида UFC ўрта вазнида рейтингнинг ТОП-15 лигидан ўрин олганди. 

ММАда умумий ҳисобда 26 та жанг ўтказган. Уларнинг 22 тасида ғалаба қозонган, 4 та жангда мағлуб бўлган. Ғалабаларнинг 6 тасини нокаут эвазига қўлга киритган. 4 та мағлубиятнинг 2 тасида нокаутга учраган. 

ММАдаги илк профессионал жангини 2010 йилда Pro Fight турнирида ўтказган. UFCда эса 2013 йилнинг декабрида дебют қилган. Айнан UFCнинг ўзидаги рекорди 9-4 ни ташкил этади. Яъни 9 та ғалаба ва 4 та мағлубият. 

Сўнгги жангини шу йил 16 май куни UFC on ESPN турнири доирасида Эрик Андерсга қарши ўтказиб, очколар ҳисобига кўра ғалаба қозонган. 

Умуман олганда, Жотко асосий ғалабаларини очколар эвазига қўлга киритган. Демак, Маҳмуд Мурадов рақибини нокаут қилишга уриниши лозим. Акс ҳолда, жисмоний томонлама чидамли бўлган рақибга нисбатан спортчимиз қийналиб қолиши мумкин. 

Эслатиб ўтамиз, Маҳмуд Мурадов ва Криштоф Жотко ўртасидаги жанг 17 октябрь куни UFC on ESPN 182 турнири доирасида ташкил этилади.