Маҳмуд Мурадовнинг рақиби ҳақида нималар биламиз? Доғистонда туғилиб, Германияда муҳожир бўлган Абусупьян Магомедов!

Бунгача спортчилар 2022 йилнинг сентябрь ойида ўтказиладиган UFC турнирлардан бирида жанг қилишлари лозим эди. Бироқ, Маҳмудда виза билан боғлиқ муаммолар юзага келганлиги сабаб, ушбу тўқнашув амалга ошмай қолганди. 

Мана энди UFC яна бир бор ушбу тўқнашувни амалга оширишга уриниб кўради. Сайтимиз ходими Ниғмонхўжа Нозимов Маҳмуднинг бўлажак рақиби Абусупьян Магомедов ҳақидаги маълумотларни тақдим этганди. Ушбу архив материални яна бир маротаба эътиборингизга ҳавола қиламиз. 

Абусупьян Магомедов аслида ким?

Абусупьян Магомедов 1990 йилнинг 2 сентябрь санасида Доғистонда туғилган.

Ажойиб ва ҳар хил услубларда рақибларини нокаут қиладиган жангчи. Россиядан Германияга кўчиб ўтган. PFL 2018 Гран-приси финалчиси.

Абусупьян Магомедов 1990 йилнинг 2 сентябрь санасида Доғистонда туғилган. Абуснинг ёшлиги тоғли Доғистонда ўтган. Барча доғистонлик болалар сингари Абусупьян ҳам ёшлигидан курашга қизиққан. Курашдаги илк қадамларини Уллубия Салават қўл остида ўрганган. Устозининг гапларига қараганда, болакай ҳеч қачон ортга чекинмаган ва доим охиргача курашган. Партерда яхши кураш тушишига қарамай, Магомедов боксни ҳам яхши кўрган. Аммо, Доғистонда боксга эътибор яхши эмасди. Унинг боксга ўтишига эса оиласининг Германияга кўчиб кетиши сабаб бўлган. Абусупьян тезда Европанинг марказига кўникди ва у ерда кикбоксинг билан шуғулланишни бошлади. Бу эса тез орада ўз самарасини берди. 

У 20 ёшида ММАда дебют қилди. Абус дастлабки саккизта жангида ғалаба қозонди. Шундан сўнг унга кучли промоушенлар қизиқиш билдира бошлади. Бироқ тўққизинчи жангида у Шталга қарши октагонга кўтарилди ва мағлуб бўлди. Бу мағлубиятдан сўнг Абусупьян Магомедов янада кучли бўлиб қайтди. У бир нечта яхши жангларда иштирок этди. Орада мағлубиятлар ҳам бўлди, бироқ мағлубиятида ҳам ажойиб ҳаракатлари эвазига мухлислар меҳрини қозонди. Шундан сўнг, 2018 йилда дунёнинг энг кучли бешта промоушенлари қаторидан ўрин олган PFL билан шартнома имзолади. PFL Гран-присининг финалига қадар етиб борди ва финалда Луис Тейлорга мағлуб бўлди.

Шундан сўнг Абусупьян Магомедов иккита жангда иштирок этди ва 2021 йилда UFC билан шартнома имзолади. Лекин UFC'да дебют қилиш учун ҳам унга деярли икки йил керак бўлди. Чунки унинг Жеральд Миршерт (Маҳмуд Мурадовни мағлуб этган жангчи) ва Алиасхаб Хизриевга қарши жанглари маълум сабабларга кўра бекор бўлди. Ҳатто, унинг 5 июнь куни "Йил нокаути соҳиби" Хоакин Бакли билан жанги ҳам бекор қилинди. Шундан сўнг Маҳмуд билан сентябрь ойида жанг қилиши лозим эди. Бироқ, Париж мезбонлик қилган UFC турнирида у Маҳмуд билан эмас, германиялик Дастин Стольцфусга қарши жанг қилди ва рақибини 1-раунддаёқ нокаутга учратди.  

Энди Абусупьян Магомедов март ойида АҚШда ҳамюртимиз Маҳмуд Мурадовга қарши октагонга кўтарилади.