Мактаб ва университет ҳамкорлиги: таълимда янгича тизим демакдир!

Жорий йилнинг 12 апрель куни Ўзбекистон давлат жисмоний тарбия ва  спорт университети ва Чиноз тумани  ҳокимлиги ҳамкорлигида Ўзбекистон Республикаси Президентининг 2022 йил 5-апрелдаги халқ таълими соҳасида таълим сифатини оширишга қаратилган йиғилишида белгилаб берилган бир қатор устувор вазифалар ижросини таъминлаш, мактаб ва университет ҳамкорлигини самарали йўлга қўйиш мақсадида “Умумтаълим мактабларида таълим сифатини ошириш: муаммо ва ечимлар” мавзусида семинар бўлиб ўтди.

Семинарда Чиноз тумани ҳокими Б. Алимбеков, Ўзбекистон давлат жисмоний тарбия ва спорт университети ректори М. Болтабаев, туман халқ таълими бўлими ходимлари, университет кафедра мудирлари ва тумандаги умумтаълим мактаблари раҳбарлари иштирок этишди. 

Тадбир давомида умумтаълим масканларида таълим сифатини ошириш, ўқитувчилар салоҳияти, ўқувчиларнинг олий ўқув юртларига кириш кўрсаткичини кўтариш, ёшларни оммавий спортга жалб қилиш орқали ҳам маънан ҳам жисмонан баркамол қилиб тарбиялаш, бу борада маҳалла ёшлари ўртасида илк маротаба “Беш ташаббус” олимпиадаси ўтказилаётган каби масалаларга алоҳида тўхталди.

Шунингдек, тумандаги "Чорводор" МФЙда жойлашган "Паҳлавон" номли спорт мажмуасида олимпия ўйинлари совриндори Абдулла Тангриев ва университетнинг Халқаро кураш турлари кафедраси мудири Шуҳрат Арсланов бошчилигидаги  профессор-ўқитувчилар томонидан спортнинг дзюдо тури бўйича маҳорат дарси ҳам ташкил этилди.

Семинар якунида Чиноз туманидаги университетга бириктирилган 48 та умумтаълим мактабларидаги мавжуд ҳолатлар, билдирилган фикрлар юзасидан муҳокамалар ўтказилди. Шу билан бирга, келгусида ҳамкорликда олиб бориладиган ишлар режаси белгилаб олинди.

Илҳом РАҲМОНОВ тайёрлади