20 апр 14:30
Янгиликлар

Футбол

"Манчестер Сити" 70 млн евродан ортиқ маблағга португалиялик футболчини ўз сафига қўшиб олиши мумкин

"Манчестер Сити" Эдерсонга ўринбосар сифатида "Порту"нинг 25 ёшли дарвозабони Диогу Кошта номзодини кўриб чиқмоқда.

"Шаҳарликлар" португалиялик футболчини келаси ёзда сотиб олиши мумкин.

Коштанинг шартномасида 63 млн фунт стерлинг (73,7 млн евро) миқдоридаги товон пули бор. "Манчестер Сити"дагилар бу суммани оширилган деб ҳисобламоқда. Бироқ, инглиз клубининг янги спорт директори Уго Виана ва 25 ёшли футболчининг агенти Жорже Мендеш ўртасидаги яхши муносабатлар туфайли "шаҳарликлар" Коштани 50 миллион фунт стерлингга (58,5 миллион евро) сотиб олишни кутмоқда.

Кошта жорий мавсум барча мусобақаларда 41 та ўйинда майдонга тушди ва уларнинг 18 тасида дарвозаси даҳлсизлигини сақлаб қолди. Футболчининг клуб билан амалдаги меҳнат шартномаси 2027 йилнинг ёзига қадар мўлжалланган. Transfermarkt футболчини 38 млн еврога баҳоламоқда.