Марказий кенгаш раиси Хоразмда тизим фаолияти билан танишди

Ўзбекистон Республикаси Президентининг “Ёшларни ватанпарварлик руҳида ва жисмоний тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги қарори аҳолининг турли қатлами, хусусан, ёшларни спортнинг техник ва амалий турларига кенгроқ жалб этиш, бунинг баробарида, уларни маънавий-ахлоқий ва ҳарбий-ватанпарварлик руҳида тарбиялаш борасида дастуриламал вазифасини ўтаётир.            

Ўзбекистон Республикаси Мудофаасига кўмаклашувчи “Ватанпарвар” ташкилоти Марказий кенгаши раиси Ҳусан Ботиров Хоразм вилоятига хизмат сафари чоғида мазкур қарор ижросининг бажарилиши, уни ҳаётга тадбиқ этиш жараёни билан яқиндан танишди.

Марказий кенгаш раиси уч кун мобайнида вилоят кенгаши раиси Давронбек Ибрагимов, вилоят техник ва амалий спорт турлари маркази директори Одилбек Ибрагимов ҳамроҳлигида тизим тасарруфидаги барча ташкилотлар ва ўқув спорт техника клубларининг фаолиятини атрофлича ўрганиб чиқди. Бунинг баробарида, ёш спортчилар, уларнинг тренерлари билан учрашиб, келгуси режалари, мақсад ва истаклари билан қизиқди. Мазкур ташкилотлар томонидан оммавий касб эгаларини тайёрлаш жараёнига ҳам эътибор қаратди.

Шунингдек, Ҳ.Ботиров соҳа мутассаддилари иштирокида уюштирилган йиғилишда қатнашиб, ўрганишлар чоғида дуч келинган баъзи камчиликлар ҳақида сўз юритди ва уларни бартараф қилиш юзасидан тегишли топшириқлар берди. Келгусида амалга оширилиши лозим бўлган вазифалар, жумладан, жойлардаги ташкилотларнинг инфратузилмаси ва моддий-техника базасини янада яхшилаш,  секцияларни малакали тренерлар билан таъминлаш, спорт иншоотларидан самарали ва унумли фойдаланиш, машғулотлар жараёнини замонавий талаблар даражасида ташкил этишни вақт тақозо этаётганини алоҳида таъкидлаб, бу борада ўзининг фойдали таклиф ва маслаҳатларини билдирди.

Икром ХУДОЙБЕРГАНОВ, Хоразм вилоятидан