Майк Тайсон Флойд Мейвезерга қарши жанги қаерда ва қачон ўтказилишини айтди

"Жанг 2026 йилнинг март ойида Африка қитъасида бўлиб ўтади, - деди Тайсон бир кун аввал АҚШдаги оммавий чиқишида, унинг видеоси O‘CombatSports канали томонидан эълон қилинди. - Бу ақл бовар қилмайдиган иш бўлади, биз барча рекордларни янгилаймиз. Бу спорт тарихидаги энг улкан воқеалардан бирига айланади".

Эслатиб ўтамиз, Тайсон ва Мейвезер ўртасидаги жанг кўргазмали мақомга эга бўлади. У сентябрь ойидаёқ эълон қилинган, аммо унинг тайёргарлиги ҳақида деярли ҳеч қандай маълумот йўқ эди. Мейвезер ва Мэнни Пакьяо ўртасидаги эҳтимолий реванш жанги ҳақида гап-сўзлар бошланганда, кўпчилик Тайсонга қарши жанг бекор қилиниши ёки номаълум муддатга қолдирилиши мумкин, деган фикрда эди.

Маълумот учун, 59 ёшли Майк Тайсон сўнгги бор 2024 йилнинг ноябрида рингга кўтарилиб, саккиз раунд давом этган жангда Жейк Полга имкониятни бой берганди. Унинг ўша жангдаги вазни 104 кг бўлган.

48 ёшли кичик Флойд Мейвезер сўнгги жангини 2024 йилнинг августида Жон Готти III га қарши ўтказганди. Бу ғолиби расман эълон қилинмаган кўргазмали мақомдаги жанг эди. Мейвезернинг вазни ўшанда 72 кг бўлган.