Майкл Пейж: "Менга кучлироқ рақиблар беринг!"

"Энг ёқимсиз томони шундаки, ғалаба қозонганим учун ўзимни аъло даражада ҳис қиляпман. Баъзида етарлича ҳаракат қилмайман ва натижа ҳам шуни кўрсатиб турибди. Балки, ўзимни бироз кўпроқ мажбурлашим, кўпроқ таваккал қилишим керакдир. Баъзида ҳамма нарса жуда тоза, жуда аниқ бўлишини хоҳлайман.

Мен шунчаки бундан ҳам кўпроқ нарсага қодир эканимни биламан ва октагонга чиққанимда ўзимни тийиб тургандек ҳис қилишим мени ғазаблантиради. Мен кўпроқ нарса беришни хоҳлайман. Мухлислар бунга лойиқ, UFC бунга лойиқ. Мен бундан ҳам кўпроқ нарсага қодир эканимни биламан. Ва назаримда, бунга жуда яқинман.

Услубимни бироз ўзгартиришимга тўғри келади. Балки, рақибларим олдинга чиқишлари учун қулайроқ бўладиган қилиб мослаштириш керакдир. Эҳтимол, бу мени бироз камроқ хавфли қилади, лекин иш ҳажми эвазига барибир ўз мақсадимга эришаман. Яна бошидан бошлаш керак. Аниқ жавобни билмайман. Ҳаммасини қайта кўриб чиқиш, спаррингларда синаб кўриш ва нима бўлишини кузатиш керак", — деди британиялик жангдан кейинги интервьюсида.

Ушбу ғалаба билан Пейж ташкилот билан тузган амалдаги шартномасидаги сўнгги жангини ўтказди. У энди лига билан келишувни узайтиришга эришишига умид қилмоқда.

"Мен UFC вакиллари билан ўтириб, очиқчасига гаплашиб оламан. Эшитиб қўйинг, мен бундан ҳам яхшироқ жанг қила олишимни биламан. Мен яхшироқ бўлишга интиляпман. Менга кучлироқ рақиблар беринг ва ишонинг, мен омма олдида ўзгача нарсани кўрсата оламан", — дея қўшимча қилди Пейж.