Майкл Пейж: "UFC`даги сўнгги жангимда тарихий лаҳзани тақдим этмоқчиман"

"Ўзимга босим ўтказмасликка ҳаракат қиляпман, чунки фаолиятимдан мамнунман. Кўпроқ нарсага эришишни истайман, лекин аллақачон эришган ютуқларимдан, қаердан келганимдан, қанчалик муваффақиятли чиқиш қилганимдан ва ўз номимни қандай яратганимдан хурсандман.

Мен ҳақиқий жанг санъати устаси эканлигимни кўрсатдим, чунки ўзимни ҳамма соҳада синаб кўрдим. Қўқопсиз жанг қилиш, жиу-житсу, ММА, кикбоксингда қатнашдим ва агар UFC`да қолмасам ҳам, эҳтимол, янги нарсаларни синаб кўришда давом этаман. Лекин бу ерда ҳали якунланмаган ишларим борлигини ҳис қиляпман, шунинг учун қолишни истайман. Бироқ, бу фақат менга боғлиқ эмас", – деди британиялик жангчи MMA Junkie нашрига берган интервьюсида.

UFC`да тўртта ғалаба ва битта мағлубият қайд этган Пейж барча жангларини ҳакамлар қарори билан якунлаган. Бўлажак жангда эса британиялик спортчи аниқ мақсад билан чиқади – дунёнинг энг кучли лигаси байроғи остида илк муддатидан аввалги ғалабага эришиш.

"Аввалги MVP`ни кўрсатмоқчиман. Мен UFC`га Bellator`да кўп марта тақдим этганим каби лаҳзани ҳадя қилмоқчиман. Ҳатто бу менинг сўнгги жангим бўлса ҳам, UFC`га ҳамма эслаб қоладиган тарихий лаҳзани тақдим этишни истайман. Одамлар шунчаки томоша қилиш учун қайта-қайта кўрадиган, жуда томошабоп бўлган эпизод яратмоқчиман. Одамлар: "Мен ўша турнирда бўлганман", деб айта олишлари ёки бу жангни кўраётганларида қаерда бўлганларини аниқ эслаб қолишлари учун. Мен бутун дунёдаги ММА мухлисларига шундай жангни тақдим этмоқчиман", – деб ваъда берди Пейж.

Британиялик ва ўзбекистонлик аралаш яккакураш усталари ўртасидаги ўрта вазн тоифасидаги жанг 5 сентябрь куни Париж шаҳри мезбонлик қиладиган UFC Fight Night 287 турнири доирасида бўлиб ўтади.