МБА уч учрашувни ўйинчиларнинг "бойкот"и сабаб бекор қилди

Миллий баскетбол ассоциацияси (МБА) плей-офф босқичи биринчи босқичидан ўрин олган учрашувларни номаълум муддатга қолдирди. "Милуоки" баскетболчилари "Орландо"га қарши плей-офф сериясидаги бешинчи ўйинда паркетга чиқмасликка қарор қилишган. 

Бунга "бакслар" полиция томонидан афроамерикалик аҳоли қатламига бўлаётган муносабат, зуғумни сабаб сифатида келтиришган. Ўйинчилар Кенош шаҳрида рўй берган воқеа - урушаётган икки аёлни ажратиш учун чоғланган Жейкоб Блейкка ўқ узилгани ва унинг ҳозирда касалхонанинг жонлантириш бўлимида ётганини ҳазм қила олишмаяпти. 

Миллий Баскетбол ассоциацияси "Милуоки" - "Орландо" учрашувидан ташқари, "Хьюстон" - "Оклахома" ҳамда "Лейкерс" - "Портленд" ўйинларини ҳам бекор қилди. Бу ўйинларнинг янги саналари кейинроқ эълон қилинади.