Медаллар жамғариш бўйича Ўзбекистон паралимпиячилари нечанчи ўринда?

Кечаги кун дастурида ўзбекистонлик паралимпиячилар битта кумуш медаль қўлга киритишганди. Тўппончадан ўқ отиш баҳсларида Сервер Ибрагимов жамоамизга Париж-2024 Паралимпия ўйинларидаги 15-медални тақдим этганди. Ҳозирча Ўзбекистон спорт делегацияси 6 та олтин, 5 та кумуш, 4 та бронза медали билан умумжамоа ҳисобида 12-ўринни эгаллаб турибди. Кеча 9-поғонадан жой олгандик. 

Хитой Республикаси 64 та олтин, 49 та кумуш, 29 та бронза, жами 142 та медаль билан рўйхатда катта устунлик билан пешқадамлик қиляпти. Чин юрти вакиллари кечаги баҳсларда 11 та олтин медаль қўлга киритишди. Ўттиз учта олтин, 25 та кумуш, 19 та бронза медалига эга Буюк Британия иккинчи ўринни эгаллаб турибди. АҚШ спортчилари 25 та олтин, 29 та кумуш, 13 та бронза медали билан кучли учликка якун ясашган. 

Биздан аввалги ўринларни Германия, Испания, Австралия, Италия, Украина, Бразилия, Нидерландия ва Франция терма жамоалари банд этган. Жами 59 давлат делегациялари ҳисобида камида 1 тадан олтин медаль бор. Камида 1 та бронза медалини қўлга киритган давлатлар сони 78 тага етди.