Медаллар жамғариш бўйича Япония биринчи, Ўзбекистон 13-ўринни эгаллади

Бир ҳафта давом этган йилнинг энг нуфузли мусобақаси якунида кутилганидек, мезбонлар медаллар жамғариш бўйича умумжамоа ҳисобида биринчи ўринни эгаллашди. Япониялик дзюдочилар 4 та олтин, 6 та кумуш, 5 та бронза медали билан биринчи бўлишди. 

Франция терма жамоаси 3 та олтин ва 2 та бронза медали билан иккинчи ўринни эгаллади. Кучли учликка биттадан олтин ва кумуш медални қўлга киритган Португалия терма жамоаси якун ясади. 

Кейинги поғоналардан Голландия, Грузия, Канада, Исроил, Украина ва Чехия терма жамоалари жой олишди. Номлари тилга олинган давлат дзюдочилари уйга камида битта олтин медал билан қайтишди. Яъни, 9 та давлат спортчиларига жаҳон чемпионатининг олтин медали насиб этди. 

Россия терма жамоаси 2 та кумуш ва битта бронза медали билан 10-поғонани банд этди. Бельгия, Куба, Ўзбекистон терма жамоалари биттадан кумуш медаль билан кейинги ўринлардан жой эгаллашди. Умуман олганда, 25 та мамлакат терма жамоаларига жаҳон чемпионатининг камида битта бронза медали насиб этган.