Мераб Двалишвили ўз жангини тасдиқлади. Сана ва манзил маълум

Яқинда АҚШ фуқаролигини олган Мераб дивизион чемпиони Шон О’Мэллига қарши октагонга чиқади. Ушбу жанг 14 сентябрь куни АҚШнинг Лас-Вегас шаҳрида ташкил этиладиган UFC 306 турнири доирасида бўлиб ўтади. Жангга 2,3 миллиард долларга баҳоланадиган "Сфера" аренаси мезбонлик қилади. 

Мераб Двалишвили айни пайтда Ҳиндистон сафарида бўлиб турибди. Мухлислар билан учрашган Мераб UFC India нашрига интервью берди ва унда Шонга қарши жангини эълон қилди.  

"Сентябрь ойида "Сфера"да Шон О'Мэллига қарши жанг қиламан", — деган Двалишвили.

Бу 2017 йилда UFC промоушенига қўшилган Мераб учун илк чемпионлик жанги бўлади. У ўзининг сўнгги жангини 18 февраль куни UFC 298 турнирида икки вазнда собиқ UFC чемпиони америкалик Генри Сехудога қарши ўтказиб, очколар ҳисобига кўра ғалаба қозонган эди. О'Мэлли эса сўнгги жангида 10 март куни UFC 299 турнирида Марлон Вера билан учрашиб, рақибидан реванш олишга муваффақ бўлганди.