Месси ПСЖга 700 млн евро фойда келтирган

Лионель Мессининг трансфери тижорий келишувлар туфайли қўшимча 700 млн евро даромад келтирди. Месси бир йил аввал “Барселона”дан эркин агент сифатида Париж клубига 2 йиллик шартнома асосида келиб қўшилган эди. Унинг клубдаги шартномасига кўра, футболчи ПСЖдаги биринчи йил учун 30 млн евро, иккинчи йил учун эса 40 млн евро ишлаб топади. 

Франция клуби Месси келганидан сўнг Dior, Gorillas, Crypto.com, PlayBetR, GOAT, Smart Good Thins, Volt, Big Cola, Sports Water ва Autohero каби бир қатор брендлар билан тузилган фойдали битимлар туфайли даромадини 13 фоизга орттирди.

“Барселона” аргентиналик футболчини қўйиб юбориш орқали 137 млн евролик даромадидан айрилди. Қайд этилишича, биргина “Месси 10” формаси савдосидан тушадиган даромад йиллик 200 млн дан ортиқни ташкил қилган.

ПСЖ Леони жалб қилганидан кейин бир миллиондан ортиқ форма сотган ва уларнинг 60 фоизига “Месси 30” ёзуви туширилган. Улар ўтган йили 90 евродан 160 еврогача бўлган нархда пулланган.