Мейвезер Пакьяога қарши реванш жанги ҳақида қатъий фикр билдирди

Куни кеча Пакъяо - Мейвезер ўртасидаги реванш жангининг Саудия Арабистонида ўтказилиши мумкинлиги ҳақидаги хабар дунёнинг кўзга кўринган оммавий ахборот воситаларида эълон қилинган эди. 

Албатта, бу хабар ўз-ўзидан тарқагани йўқ. Яқинда ижтимоий тармоқларда Мейвезернинг Яқин Шарқдаги сармоядорлар билан учрашгани ва унда Пакьяога қарши иккинчи жангнинг Саудия Арабистонида ўтказилиши муҳокама қилингани ҳақидаги видео тарқалганди. 

Лекин Флойд маълумотни кескин рад этиб, бу видео эски эканлиги ва ҳеч қандай Пакьяо билан реванш жангига алоқаси йўқлигини айтди. 

"Саудия Арабистонига анча олдин боргандим", - дейди Мейвезер Fighthype нашрига берган интервьюсида. - Ҳа, мен улар билан Саудияда ўз жангларимни ўтказиш масаласида гаплашганман. Лекин бу Пакьяога қарши ўтказиладиган жанг эмасди. Кейин суҳбатимиз фақат бокс жанглари эмас, балки, турли кўнгилочар дастурлар ҳақида борганди".