Мишель Соро Мадримов - Курбанов жангига муносабат билдирди

Хабарингиз бор, эртага Саудия Арабистони пойтахти Ар-Риёд шаҳрида навбатдаги профессионал бокс оқшоми ўтказилади. Унинг доирасида ҳамюртимиз Исроил Мадримов россиялик Магомед Курбановга қарши рингга кўтарилади. Жанг ғолиби вакант бўлиб турган WBA камарини қўлга киритади.   

"Мен бутун вужудим билан Мадримовнинг ғалабасига ишоняпман. У ҳақиқий жентльмен ва чемпион. Исроил Курбановдан ҳар томонлама яққол устун ва кучли. Ишончим комил, у фирибгар Магомедни додини бериб қўяди. Аслида бу чемпионлик жангида мен рингга чиқишим керак эди. Менинг Курбановга қарши кечган жангимдаги коррупция ботқоғига ботган ҳакамлар эртага бўлмайди. Магомедга энди ҳакамлар ёрдам бера олмайди. Исроил, сенга омад тилайман. Курбановни "йўқ" қил ва кейин мен билан жанг ўтказ", - деди Соро.

Эслатиб ўтамиз, ўтган йилнинг май ойида Россияда ўтган бокс оқшомида Курбанов ҳакамларнинг ёрдамида Сорони мағлубиятга учратган эди. Буни ўшанда ҳатто россиялик журналистлар ҳам айтишганди. Мадримов ва Соро эса шу кунгача икки бор тўқнаш келган. Тошкентдаги жангда Мадримов техник нокаут эвазига ғалаба қозонган бўлса, Лондондаги жангнинг иккинчи раундидан кейин Мишель қоши ёрилгани учун баҳсни давом эттира олмаганди.