MLS. "Сиэтл Саундерс" - чемпион!

Бутун мавсум давомида узоқ ва машаққатли йўлни мардонавор босиб ўтиб, ўз минтақасида чиройли ғалабаларга эришиш асносида фақат чемпионликни мақсад қилган икки жамоа "Сиэтл Саундерс" ва "Торонто" бош совринни қўлга киритиш учун кескин ва муросасиз жанг олиб боришди. Учрашувга тўхталадиган бўлсак, тенгма-тенг курашлар остида ўтган биринчи бўлимда мухлислар гол кўришмади. 

Барча голлар ўйиннинг иккинчи ярмига тўғри келди. Дастлаб, мезбонларнинг голландиялик легионери Келвин Леердам ҳисобни очди. Орадан чамаси йгирма дақиқалар ўтгач, захирадан майдонга тушган Виктор Родригес ўзини кўрсатди. 90-дақиқада перулик ҳужумчи Рауль Руидиас рақиб жамоа ҳимоячисини ўзининг фантастик тезлиги эвазига ортда қолдириб, тўпни аниқ нишонга олди ва орадаги фарқни йирик кўринишга олиб келди. 

Ваниҳоят, асосий вақтга қўшиб берилган дақиқаларнинг учинчисида торонтоликларнинг испаниялик иқтидорли вингери Алехандро Посуэло томонидан берилган заргарона пасни маҳаллий тажрибали ҳужумчи Жози Алтидор боши билан чиройли тарзда дарвозага жойлаб қўйди. Шундай қилиб, кўҳна Вашингтон шаҳри бош жамоаси икки йиллик танаффусдан кейин яна тахтга қайтди ва ўз тарихида 2-марта мамлакат чемпионига айланди!