"Монца" Италия А Сериясига йўлланмани қўлга киритди

Икки учрашувдан иборат плей-офф баҳсининг дастлабкисида "Монца" 2:1 ҳисобида ғалаба қозонганди. Жавоб ўйинида "Пиза" катта куч билан олдинга ташланди ҳамда илк ўн дақиқаликда иккита гол киритди. Бунга меҳмонлар 20-дақиқада жавоб қайтаришди. 

Иккинчи бўлимда эса улар иккинчи голни ҳам киритишди. "Пиза" эса бир амаллаб 90-дақиқада Мастинунинг саъй-ҳаракатлари туфайли ҳисобни 3:2 кўринишига келтирди. Асосий вақтда ҳисоб бошқа ўзгармади ҳамда жамоалар экстра-таймларга мурожаат қилишди. 

Қўшимча бўлимларда "Монца" футболчилари тетикроқ эканлиги аён бўлди, уларнинг икки голи жамоани А Серияга йўлланма олишига замин яратди, якуний ҳисоб - 3:4 (умумий 4:6).

Эслатиб ўтамиз, Б Серияни "Лечче" пешқадам сифатида якунлади, "Кремонезе" эса иккинчи ўринни банд этди. Ҳар иккала клуб ҳам А Серия чипталарини нақд қилди.