МОҚ бош котиби Ойбек Касимов 1.5 млн долларлик соат сотиб олгани ҳақидаги хабарларга муносабат билдирди

Аввалроқ, ОАВда Касимовнинг қўлида гўёки 1.5 млн доллар нархга эга соат тақилгани ҳақидаги хабарлар тарқалган эди. МОҚ бош котиби Repost.uz мухбири билан суҳбатда мазкур хабарларга муносабат билдирди.

"Балки бу турдаги соат, яъни суратда акс этган соат ҳақиқатан ҳам шунча нархга эгадир. Лекин менинг қўлимдаги соат, умуман бошқа соатдир. "RichardMiller" туридаги соатга алоқаси йўқ. Ишлаб чиқарувчиси ҳам, дизайни ҳам умуман фарқ қиладиган соат. Бунчалик суммага соат сотиб олишим мумкин деб ўйламаганман ҳам. Менда бу соатни сотиб олиш имкони бўлган тақдирда ҳам бунчалик катта суммага соат сотиб олмасдим. Соатга катта қизиқишим ҳам йўқ", деди Ойбек Амилович.

Айни дамда Ойбек Касимов Ўзбекистон делегацияси билан биргаликда Париж шаҳрида Олимпия ўйинларига тайёргарлик кўрмоқда.