МОҚ президенти байдарка ва каноэчиларимиз йиғинида бўлди

Ушбу йўналишда терма жамоамиз вакиллари шу пайтгача Токио-2020 Олимпия ўйинларига 2 та, Паралимпия ўйинларига эса 3 та йўлланма қўлга киритишган. Яна бир неча ҳафтадан сўнг эса вакилларимизни Токио-2020 га йўлланма берувчи сўнгги старт кутиб турибди. Мана шундай масъулиятли паллада тайёргарлик айни авжи палласида.

Ўз навбатида давлатимиз спортчиларимизнинг беками кўст шуғулланишлари учун барча шароитларни яратиб бермоқда. Кеча МОҚ президенти Рустам Шоабдураҳмонов Тошкент вилояти Туябўғиз сув омборидаги терма жамоамиз базасига ташриф буюриб, спортчиларимиз билан учрашди ва улар учун қурилаётган янги объектларни кўздан кечирди. 

Ташриф давомида МОҚ раҳбарига XXXII ёзги Олимпия ҳамда XVI Паралимпия ўйинларига тайёргарлик кўриш ва муносиб иштирок этиш тадбирларини мувофиқлаштириш Штаби бошлиғи, Ўзбекистон таэквондо WT ассоциацияси раиси Шерзод Тошматов ҳамроҳлик қилди.

Айни пайтда спортчиларимиз учун Туябўғиз сув омбори бўйида замонавий шароитларга эга қўшимча янги спорт базаси қурилмоқда, эскиси реконструкция қилинмоқда. Байдарка ва каноэда, шунингдек, слаломда эшкак эшиш бўйича терма жамоамизни март ойида Таиландда ўтадиган Токио Олимпиадасига лицензион Осиё чемпионати кутиб турибди.

Академик эшкак эшувчиларимиз эса апрель ойида Жанубий Кореяда ўтадиган қитъа биринчилигида Токио-2020 йўлланмаси учун стартга чиқишади. Атлетларимиз об-ҳавонинг бугунгидек қийинчиликларига қарамай шуғулланишда давом этишмоқда. Мақсад аниқ – XXXII ёзги Олимпия ўйинларига имкон қадар кўпроқ лицензия қўлга киритиш ва тўрт йилликнинг энг муҳим спорт фестивалида муваффақиятли иштирок этиш.

Бунинг учун эса табиийки спортчи ва мураббийларга барча керакли шароитларни яратиб бериш талаб этилади. МОҚ раҳбари бугунги ташрифи давомида мутассадиларга бу борада керакли кўрсатма ва тавсияларни берди.