МОҚ президенти оғир атлетикачиларимизнинг онлайн машғулотини кузатди

Полвонларимизнинг имкониятларини чамалаш, техник ва тактик тайёргарлигини кўздан кечириш мақсадида онлайн машғулот ўтказилди. Мазкур жараённи МОҚ президенти Рустам Шоабдураҳмонов ҳамда Ўзбекистон оғир атлетика федерацияси раисининг биринчи ўринбосари Шаҳрулло Маҳмудов ZOOM платформаси орқали кузатиб боришди. 

Суҳбат чоғида оғир атлетика бўйича кейинги ҳафта охирида ўтказилиши режалаштирилаётган халқаро онлайн-мусобақага тайёгарлик ҳақида сўз борди. Рустам Шоабдураҳмонов атлетларнинг машғулот жараёнини кузатар экан, уларнинг жисмоний ҳолатига ижобий баҳо берди. 

Шунингдек, МОҚ раҳбари томонидан ушбу спортнинг оммавийлигини ошириш, ёшлар орасида соғлом турмуш тарзини тарғиб қилиш мақсадида оғир атлетикачилар иштирокида онлайн-мусобақалар, турли онлайн учрашувлар ва ёш ҳаваскорлар учун мотивацион руҳдаги мурожаатлар, мастер-класс, қизиқарли материаллар тайёрлаш борасида кўрсатмалар берилди. 

Ўз навбатида, спортчиларга машғулотлардан чалғимаслик, зал ва меҳмонхонадан ташқари бошқа бирор жойга бормаслик, бугунги муҳим даврда эҳтиёткорлик чоралари, карантин қоидаларига риоя қилиш зарурлиги яна бир бор эслатилди.