МОҚ раиси Гран-при олдидан курашчиларимизга омад тилади

Ушбу мусобақа классик курашчиларимиз учун узоқ танаффусдан кейинги илк турнир бўлиб, лицензион мусобақага асосий тайёргарлик босқичи бўлиб хизмат қилади.

МОҚ раиси Рустам Шоабдураҳмонов ZOOM платформаси орқали Загребда бўлиб турган спортчи ва мураббийларимиз билан онлайн мулоқот қилди. Онлайн учрашувда шунингдек, МОҚ раиси ўринбосари Шерзод Ташматов, Ўзбекистон спорт курашлари ассоциацияси ва МОҚ мутасадди вакиллари иштирок этишди.

“Сизларни жуда муҳим старт кутиб турибди. Илоҳим, мусобақа жамоамиз учун омадли ва муваффақиятли бўлсин. Кураш мухлислари Сизларнинг ғалабаларингизни анчадан бери соғиниб қолишган. Мусобақада барчангизга омад ва зафарлар ёр бўлсин”, – деди МОҚ раиси.

Онлайн мулоқотда терма жамоа мураббийи Равшан Рўзиқулов курашчиларимизнинг кайфияти ва саломатликлари, олдиндаги режалар ҳақида гапириб ўтди. Ўз навбатида, Рустам Шоабдураҳмонов жамоамизнинг Олимпия ўйинларига муносиб тайёрланишлари учун ҳукуматимиз томонидан барча шароитлар яратиб берилиши ҳақида таъкидлади.

Маълумот учун, Загреб Гран-приси 16-17 январь кунлари бўлиб ўтади. Мусобақадан сўнг жамоамиз ушбу шаҳарда 14 кунлик ўқув-машғулот йиғинида бўлишади. Ҳозирда “классик” курашчиларимиз ҳисобида Токио Олимпиадаси учун 3 та йўлланма мавжуд.