Москвада AIBA Конгресси якунланди, Ғофур Раҳимов ташкилот раҳбарлигига сайланди

ЯНГИЛАШ

Ғофур Раҳимовга 134 мамлакат федерацияларининг 86 таси овоз берди ва шу тариқа ҳамюртимиз сайловда ғолиб бўлди.

ҒАЛАБА! ҒОФУР РАҲИМОВ АИБА ПРЕЗИДЕНТИ!

Сайлов натижалари ҳисобланмоқда.

Президентлик учун номзодлар сайлов залидан чиқариб юборилди. Овоз бериш жараёни бошланди!

Шундан сўнг Серик Конакбаевга сўз берилди: "Бу ерда бўлиш мен учун катта шараф. Бугун ҳаётимдаги энг муҳим кун. Биз бу ерга боксни сақлаб қолиш учун йиғилдик. Шахсий манфаатлар устун бўлмаслиги лозим. Ягона мақсад йўлида ишламасак АИБА ва боксни йўқотиб қўямиз".

Ғофур Раҳимов сўзга чиқди: "Тўрт йил сизлар билан бирга ишлашга тайёрман. Буни албатта сизлар ҳал қиласизлар. Бокс келажаги сизнинг қўлингизда. Биргаликда ишлаб қарздорликларни ёпамиз. Бокс Токиодаги Олимпиадада албатта бўлади. Олимпиада ва бокс бир оиладир. Молиявий масалаларда кўп ишлашимиз лозим. Бу менинг қўлимдан келади".

Ижроқўм аъзолиги учун сайловлар бошланди. 

Конгресс ўз ишини давом эттиради. 

Конгрессда тушлик эълон қилинди.

Яна бир маротаба йўқлама ўтказилмоқда. Бу залдан хеч ким чиқиб кетмаганлигига ишонч ҳосил қилиш учун амалга оширилмоқда. 

Сайлов бўлиб ўтаётган зал жиддий равишда қўриқланмоқда. Хеч ким киритилмаяпти ва чиқарилмаяпти.

Сайлов олдидан овоз бериш тизими текширувдан ўтказилмоқда. 

Делегатлар тугма босиш орқали ўзлари лозим топган номзодга овоз берадилар. Овоз бериб бўлганлар ташқарига чиқиб кетмасликлари ҳақида огоҳлантирилдилар. Сайлов қоидалари тушунтириб берилмоқда. 

Сайловда 136 та мамлакат вакиллари овоз берадиган бўлдилар. 

Ҳозирча йўқлама ўтказилмоқда. 

Конгресснинг иккинчи куни бошланди. 

Кун тартибидан ўрин олган энг асосий масала ташкилотга янги раҳбар сайлашдир. Президентлик сайловида ҳамюртимиз Ғофур Раҳимов ҳам иштирок этмоқда. Унга бу борада Осиё бокс Конфедерацияси раҳбари, қозоғистонлик Серик Конакбаев рақиблик қилади. 

Москва шаҳрида AIBAнинг навбатдаги Конгресси давом этмоқда. Кеча бошланган йирик тадбир бугун ниҳоясига етади.