Мотокросс. Тўртта давлат спортчилари қатнашган мусобақа ғолиблари Олмалиқда аниқланди ФОТОГАЛЕРЕЯ

“Ватанпарвар” ташкилоти Марказий кенгашининг кўрсатмасига асосан Республика техник ва амалий спорт турлари маркази томонидан ташкил этилган ушбу мусобақа ёшлар ўртасида спортнинг техник ва амалий турларини оммалаштириш, уларни айнан мана шу спорт турларига кенгроқ жалб этишга хизмат қилди. 

Мусобақада мамлакатимизнинг турли ҳудудларидан келган ўнта жамоа спортчилари билан бир қаторда Россия ҳамда Қозоғистон ва Тожикистон Республикалари мотокросчилари шахсий биринчиликда ғолиблик учун куч синашди.

Мусобақанинг 85 сантиметр куб синфидаги пойгаларда қозоғистонлик Никита Карнаухов биринчи бўлиб маррага етиб келган бўлса, ҳамюртларимиздан Жасурбек Самадов ва Аброрбек Жуманов иккинчи ҳамда учинчи поғонадан жой олди.

125 сантиметр куб синфида Владимир Сичев (Россия), Никита Карнаухов (Қозоғистон) ва Андрей Сазонов (Ўзбекистон) шоҳсупага кўтарилади. Ҳажми 500 сантиметр куб бўлган мотоциклларда ўтган баҳсларда биринчи ўринни Тошкент вилояти жамоаси аъзоси Шавкат Сулаймонов эгаллаган бўлса, бухоролик Бекзод Халимбоевга иккинчи, навоийлик Марсел Галиевга учинчи ўрин насиб этди.

Умумжамоа хисобида 877 балл тўплаган Бухоро вилояти жамоаси биринчи ўринни эгаллаб, мотокросс бўйича Ўзбекистон очиқ Кубогини қўлга киритган бўлса, 624 балл билан Навоий вилояти жамоаси иккинчи, 574 баллга эга бўлган Тошкент вилояти жамоаси учинчи ўринни эгаллади.

Мусобақа ғолиблари Ўзбекистон мудофаасига кўмаклашувчи “Ватанпарвар“ ташкилоти марказий кенгаши, Республика техник ва амалий спорт турлари марказининг диплом, эсдалик совғалари билан тақдирланди. 

Музаффар ХАДЖИЕВ, “Ватанпарвар” ташкилоти Тошкент вилояти кенгаши бош мутахассиси 

Илҳом РАҲМОНОВ ўз мухбиримиз