MPL 5. Матбуот анжумани қандай ўтди? Тошкентда жаҳон чемпионати ўтказилади, янги камар учун илк жанг

Матбуот анжуманида лига ташкилотчиси Маҳмуд Мурадов, мураббий - Жасур Алижонов, оқшом жангчилари иштирок этиб, ОАВ ходимлари, мухлисларнинг саволларига жавоб қайтаришди. 

Тадбирда Мурадов UFC октагонига қачон қайтиши ҳақидаги саволга ҳам жавоб берди.

Жасур Алижонов Muradov legion Team'нинг Чимён тоғ ҳудудида бир ҳафта давом этган йиғини ҳақида гапирди. Шунингдек, мураббий нега ушбу турнирда ҳаваскорлар ўртасида жанглар ўтказилаётганлигига ҳам ойдинлик киритди:

"Юртимизда истеъдодли ёшлар кўп. Мақсадимиз - ҳаваскор спортчиларни ҳам профессионаллик томон етаклаш. Билишимча, келаси йил Ўзбекистонда ММА бўйича жаҳон чемпионати ташкил этилади. Ҳаваскорлар орасида ҳам ёрқин жанг кўрсатадиган спортчилар бор. Мана шундан ёшларни лигамиз орқали ривожланишига ёрдам бермоқчимиз", - деди Алижонов.

ММА мухлислари учун энг яхши янгилик сифатида эса лиганинг чемпионлик камари намойиш этилди ҳамда бу камар учун биринчилардан бўлиб Рамазон Темиров жанг қилиши мумкинлиги айтилди. Чемпионлик камари учун курашиш тартиби ҳам тушунтирилди.

Кечанинг марказий жанги иштирокчилари Шоҳасан Мирзаматов ва Эдил Эсенгулов ҳам ўзларининг жанглари ҳақида фикр билдиришди. Аввалига қирғизистонлик жангчи нега Мирзаматовга «вызов» ташлагани ҳақидаги саволга жавоб берди:

«Бу шунчаки спортча қизиқиш».

«Чорловни қабул қилдим. Ҳа, иккимиз ҳам Марказий Осиёнинг таниқли жангчисимиз. Ким кучли эканлигини октагонда билиб оламиз», - деди Шоҳасан.

Анжуман қизиқарли савол-жавобларга бой бўлди. Тадбирдан сўнг, анъанага мувофиқ вазн ўлчаш ҳамда Face to Face маросими бўлиб ўтди.

Cарвиноз РАҲМОНҚУЛОВА, ўз мухбиримиз (Қўқон шаҳридан махсус)