Муҳаммадзоҳид Суяров Жаҳон кубоги йўлланмасига эга чиқди

Мусобақанинг эркаклар ўртасидаги баҳсларида Жаҳон кубогига бериладиган йўлланмалар сўнгги турда аниқланди. Муҳаммадзоҳид Суяров оқ доналарда туркманистонлик Сапармират Атабаевни мағлубиятга учратиб, 7 очко билан қўшимча кўрсаткичларга кўра 4-ўринни эгаллади. Кучли учлик қозоғистонлик шахматчилар томонидан банд этилди. Ансат Алдияр 9 имкониятдан 7,5 очко жамғариб, мусобақа ғолибига айланди. 

Агар сўнгги турда ҳамюртимиз Саидакбар Сайдалиев айнан Алдиярни мағлуб этганида, у ҳам Жаҳон кубоги йўлланмасини қўлга киритарди. Афсуски, Сайдалиев мағлубиятга учраб, якунда 6 очко билан 13-ўрин билан кифояланди. Гроссмейстеримиз Абдумалик Абдусалимов ҳам бугун сўнгги турда ютқазмаганида Жаҳон кубоги чиптасига эга чиқарди.  

Маълумот учун, FIDE Жаҳон кубоги шу йил Ҳиндистонда ташкил этилади. Аёллар ўртасидаги мусобақада чемпион бўлган Афруза Ҳамдамова ҳам Жаҳон кубоги йўлланмасини қўлга киритганди. Бу мусобақа 5-29 июль кунлари Грузиянинг Батуми шаҳрида бўлиб ўтади.